Saturday, August 15, 2015

Usiruhusu Visingizio Vikushinde, Visingizio Vipo Kila Siku, Ila Muda Haukusubiri.

Posted by Makirita Amani  |  at  Saturday, August 15, 2015 No comments

Ni kweli kuwa kuna wakati katika maisha unaweza kuwa na mambo mengi sana yanayokufanya ushindwe kuendelea na mipango yako mingine uliyoipanga. Inaweza kuwa unafanya kitu ambacho kweli kinaonekana ni cha maana na una kila sababu ya kuendelea kukifanya na ukaona una haki zote za kuacha kile kingine kisubiri. Watu wengi wameshindwa kukamilisha mipango mingi wanayoipanga kwa kuwa tu wameruhusu kuharibu ratiba zao, wamekubali yale mambo mengine yanayojitokeza yawazuia kukamilisha ratiba zao walizokwisha anza kuzitekeleza.
MUDA WAKO NDIO HAZINA YAKO KUU, ULINDE SANA.
 
Wengi wetu mara nyingi ikitokea kuwa tumeshindwa kufanya kitu fulani basi ni wepesi wa kutafuta sababu na kusema ooh unajua nilikuwa na kazi/shughuli nyingi sana za kufanya ndio maana nikashindwa kufanya hili, lakini ndugu yangu ni vyema tukielewa kuwa hata kama una shughuli nyingi kiasi gani lazima uwe na ratiba na mpango kazi , kuweza kujua ni yepi unatakiwa kuyafanya , hivyo hata inapotokea kuwa una vitu vingi vya kufanya basi uhakikishe unavifanya vyote kwa ufanisi, inawezekana tu ukiamua na kuwa na nia ya dhati ya kufanya hilo, na pia kama kweli unapenda hicho unachofanya hautakubali kuona unaacha kufanya hata kama itagharimu muda zaidi, utakuwa tayari kujitoa kuweza kufanya hiyo kazi/shughuli na ukiikamilisha nawe utajisikia vizuri na kufurahi pia.
SOMA; Nikipata Muda Nitafanya.
Wengi wetu ni wepesi wa kutafuta visingizio, ndugu yangu tambua visingizio havikusaidii na havitakusaidia kamwe, visingizio havisaidii kutimiza ule mpango kazi wako , vinaweza onekana ni vya maana lakini vinakupoteza , vinakuchelewesha na vinaweza kukuzuia kufika pale unatakiwa kufika, maana ukijipa visingizio utaona una kila sababu ya kutokufanya na kama ikitokea kwa bahari mbaya, ndiyo namaanisha bahati mbaya umekutana na mtu anayekubaliana na visingizio vyako na akakutia moyo kuwa kweli umebanwa sana hivyo huwezi kufanya hayo basi ujue hali yako itazidi kuwa mbaya zaidi. Hakikisha unatafuta muda wa kutimiza kila ulilolipanga, muda upo ndugu yangu, hebu angalia masaa yako 24 unayatumiaje? Unataka kuniambia muda wote unafanya ya maana? Ni masaa mangapi unayatumia kwa kufanya yasiyo na faida kwako? Fikiria ule muda unazurura kwenye mitandao ya kijamii na kujihusisha na mijadala isiyo na tija kwako na jamii, fikiria hata ule muda unautumia kwa kubishana na watu tu katika mambo yasiyo ya muhimu sana kwako kwa wakati huu, kuna ule muda unapiga tu simu kwa watu na kupiga soga tu zisizo na ulazima ndugu yangu, au pengine una muda wa kulala zaidi hata ya masaa 8 kwa siku, kuna mwingine anahakikisha kila tamthilia haimpiti, anafuatilia mwanzo mpaka mwisho na anakumbuka kila kitu kilichotokea, akitakiwa kusimulia basi anasimulia kwa umahiri kabisa, lakini huyu huyu atakuambia ooh unajua nilishindwa kufanya hii shughuli kwa kuwa sina nafasi kabisa, mambo ni mengi sana, ni kweli hayo mambo uliyo nayo ni mengi, lakini je yana maana gani kwako? Yanakuongezea maana ya kuwepo hapa duniani? Au yanakufanya uzidi kuwa msindikizaji wa wengine, mshangiliaji wa wengine wanaoishi kwenye kusudi waliloumbiwa? Hauna muda wewe?
SOMA; Hatua Moja Ndogo Kila Siku Ndio Kitu Pekee Unahitaji.
Masaa 24 yanakutosha sana kufanya kila ulichopanga kufanya kama kweli ndicho ulichoumbiwa ufanye, na una nia ya dhati ya kukikamilisha, vikwazo haviwezi kupata nafasi, vikwazo haviwezi kuishinda ile nia ya ndani kabisa ya wewe kupanga hilo, hivyo ndugu yangu acha kujitetea, kaa mbali na wasiokuambia ukweli wanaofurahia huko kujifariji kwako kuwa ooh niko na mambo mengi siwezi hili hivyo labda tuahirishe, tufanye wakati mwingine n.k Tafuta mtu ambaye atakuambia ukweli, ukizembea anakushtua na kutokukubaliana na sababu zako hata kama waona zina maana, kujitetea kumefanya wengi wasifike kule wanatakiwa kufika kwa wakati muafaka.
Makala hii imeandikwa na Beatrice Mwaijengo.

KUHUSU AMKA MTANZANIA

AMKA MTANZANIA ni mtandao unaokuhamasisha wewe mtanzania kuchukua hatua juu ya maisha yako. Kupitia mtandao huu utajifunza na kuhamasika ili uweze kuchukua hatua ya kufikia mafanikio makubwa. Kama unataka kutumiwa makala nzuri na vitabu moja kwa moja kwenye email yako, BONYEZA MAANDISHI HAYA na ujaze fomu. KARIBU SANA UJIFUNZE NA KUHAMASIKA

Pata Makala Inapotoka

Weka email yako hapa na uwe wa kwanza kupata makala nzuri inapowekwa kwenye mtandao huu.

Washirikishe Wengine Makala Hii Nzuri

Makala Zinazohusiana na Hii

0 comments:

USIACHE KUWEKA MAONI YAKO HAPA.

© 2013 AMKA MTANZANIA. WP Theme-junkie converted by BloggerTheme9
Blogger templates | Distributed By: BloggerBulk Proudly Powered by Blogger.
back to top