Monday, January 27, 2014

Hii Ndio Kazi Inayolipa Sana Ambayo Hata Wewe Unaweza Kuifanya.

Posted by Makirita Amani  |  at  Monday, January 27, 2014 2 comments

  Katika ulimwengu wa kazi ama ajira kuna baadhi ya kazi fulani huwa zinaonekana zinalipa sana na hivyo watu wengi kuzitamani. Kutamani huku kumefanya baadhi ya watu kujidharau na kuishi maisha ambayo sio ya furaha kutokana na kuona kazi zao kutokuwa za viwango vile wanavyodhani.

  Hata wale wanaofanikiwa kubadili kazi na kwenda zile walizodhani zinalipa sana na zitawapatia furaha hujikuta baada ya muda wanaona mambo ni yale yale tu. Hata watu ambao wanafanya kazi zinazoonekana zinalipa sana bado sio wote waliofanikiwa ama kuwa na furaha sana kupitia kazi hizo.

  Huenda wewe ni mmoja wa watu ambao unaidharau sana kazi yako na kutamani kazi fulani. Huenda unadhani ukipata kazi hiyo utafanikiwa haraka kwa vile wale walioko kwenye kazi hiyo wanalipwa fedha nyingi sana.

               kazi inayolipa

  Leo nataka nikushirikishe kazi moja inayolipa sana ambayo unaweza kuanza kuifanya kesho na ukapata mafanikio makubwa na furaha kubwa kwenye maisha yako. Ukiweza kuifanya kazi hiyo utasahau manung’uniko yote uliyonayo kuhusu kazi yako. Utapata mafanikio makubwa na utayafurahia maisha kwa kiwango kikubwa.

  Kazi hiyo unayoweza kuifanya na ukafanikiwa sana ni kazi unayofanya sasa. Namaanisha kazi unayofanya sasa ndio kazi inayolipa sana na kama ukiweza kuifanya vizuri na kujua fursa zote zinazopatikana kwenye kazi hiyo basi utapata mafanikio makubwa sana. Kama tulivyoona kwenye makala; hivi ndizo fursa unazozipita kila siku, mahali popote ulipo kuna fursa nyingi ambazo bado hujazijua. Kutokuzijua fursa hizo kunakufanya uamini unachofanya hakina maana na unabaki kuangalia wanavyofanya wengine na kuvitamani.

  Ili uweze kupata mafanikio makubwa kwenye kazi unayofanya sasa ni lazima uwe tofauti na ulivyo sasa. Ni lazima uifanye kwa tofauti na unavyofanya sasa. Tambua kwamba una uwezo mkubwa sana uliopo ndani yako, pia tambua una vipaji na ubunifu wa kipekee. Tumia vitu hivi vitatu pamoja na mazingira ya kazi unayofanya kuweza kutoa majibu mazuri. Fanya kazi hiyo kwa juhudi na maarifa na weka ubunifu mkubwa kwenye kazi yako. Kwa kufanya hivyo utapata majibu mazuri na kila mtu ataifurahia kazi yako kitu ambacho kitakupatia furaha kubwa na mafanikio makubwa.

  Kitu kingine muhimu kwenye mafanikio ya kazi unayofanya ni kupenda unachofanya. Kama tulivyoona kwenye makala; kama unataka kufanikiwa usifanye kazi, ili uweze kufanikiwa kwenye jambo lolote unalofanya ni muhimu ulipende jambo hilo. Kama unaichukia kazi yako hata ungepewa fedha nyingi kiasi gani bado itakuwa vigumu sana kuridhika na kufurahia kazi yako. Na kama huwezi kuridhika na kufurahia kazi yako ni vigumu sana kupata mafanikio.

  Jitahidi sana kufurahia unachofanya, maana unapofanya kwa upendo ndipo unapoweza kutumia vipaji na ubunifu wa kipekee uliopo ndani yako. Kwa kutumia vitu hivyo unajikuta unazalisha majibu mazuri kwenye kazi yako na hii inakufanya ufurahie kazi yako na upate mafanikio.

  Kitu kingine muhimu cha kufanya ili uweze kufanikiwa kwenye kazi unayofanya ni kubadili mtazamo wako. Vitu vingi kwenye maisha yetu vinaanza na mitazamo yetu binafsi. Jambo lolote linapotokea kinachofanya watu wafanikiwe au washindwe ni mitazamo yao. Kama una mtizamo hasi juu ya kazi yako kila siku utaiona ni mbaya na hakuna njia yoyote unayoweza kunufaika na kazi yako. Utaishia kulalamika kila siku na mwishowe utashindwa kupata mafanikio. Kama una mtizamo chanya juu ya kazi yako mara zote utakuwa unaangalia njia za kufaidika na kazi hiyo. kwa kufanya hivyo utaziona fursa nyingi ambazo wengine hawazioni na utajikuta unafanikiwa sana.(soma; hili ndilo gereza kuu la maisha yako)

  Kazi unayofanya sasa ndio kazi inayolipa sana, wacha kukodolea macho kazi ya mwenzako. Zijue fursa nyingi zilizopo kwenye kazi yako na anza kuzitumia ili upate mafanikio makubwa kupitia kazi hiyo. Hii inafanya inakubalika kwenye kazi za kuajiriwa, kazi za kujiajiri na hata biashara.

KUHUSU AMKA MTANZANIA

AMKA MTANZANIA ni mtandao unaokuhamasisha wewe mtanzania kuchukua hatua juu ya maisha yako. Kupitia mtandao huu utajifunza na kuhamasika ili uweze kuchukua hatua ya kufikia mafanikio makubwa. Kama unataka kutumiwa makala nzuri na vitabu moja kwa moja kwenye email yako, BONYEZA MAANDISHI HAYA na ujaze fomu. KARIBU SANA UJIFUNZE NA KUHAMASIKA

Pata Makala Inapotoka

Weka email yako hapa na uwe wa kwanza kupata makala nzuri inapowekwa kwenye mtandao huu.

Washirikishe Wengine Makala Hii Nzuri

Makala Zinazohusiana na Hii

2 comments:

USIACHE KUWEKA MAONI YAKO HAPA.

© 2013 AMKA MTANZANIA. WP Theme-junkie converted by BloggerTheme9
Blogger templates | Distributed By: BloggerBulk Proudly Powered by Blogger.
back to top